مقالات رأي

جايين على كعكة يتقاسموها!

الكاتبة| سوزان عويوي

هدول من لما أجو ..وهم جايين على كعكة يتقاسموها

هدول ما عاشوا معنا انتفـ ـ ـاضة الحجار .. ما تقاسموا مع جيرانهم الخبز والمي وقت منع التجوّل.

هدول ما انصلبوا على حيطان الشوارع اللي كان ينكتب عليها بعلب الرش كل البيانات الصادقة والاخبار اللي ما فيها كذب .

هدول ما نظفوا الشوارع من الحجار والكوشوك المولع… ولا اختنقوا بريحة الغاز السام المسيل للدموع ولا شافوا القنابل الملونة السامة ولا سمعوا قنابل الصوت بعز الليل ولا قنابل الإضاءة الليلية اللي كانت تنزل على البيوت بالبراشوت.

أولادهم ما صابتهم حالات الرعب من صوت الرصاص بالليل ولا انفزعوا من نومهم على اقتحامات الجيش للبيوت.

هدول ما زاروا سجون الأرض المحتلة وهم راكضين لساعات علشان يشوفوا حبايبهم الاسـ ـ ـرى لدقائق.

هدول ما حفروا قبور حدا من أهلهم بالليل بالسر ويدفنوهم قبل تيجي دورية الجيش تسرق الجثمان وتسرق منه كل الأعضاء وترجعه للشـ ـ ـهيد بكيس اسود.

علشان هيك هدول ما عاشوا فلسطينيتنا ولا عرفوا شو يعني الوطن.

هدول عندهم الوطن كعكعة يتقاسموها وصندوق علي بابا ومعالق من ذهب لأولادهم ..النا وطنا والهم كعكتهم.

اظهر المزيد

مقالات ذات صلة

اترك رد

إغلاق